L'extrait ci-dessous est le 10 épisode lu par l'auteur
dans la revue Vès l'comprenez co?
(pp. 84-90 dans le livre)

 

           C’est l’Gabriel qui n’îmout m’ co trop la soupe.

        —    Non merci, Madame, djè n’veux pont d’soupe. Èt...

        —   Tè m’a dèrès des nouvelles, èm’ n’afant. C’èst d’ la soupe dè potiron...

    —  Djè n’sais soûl’mat c’què c’est. On dèrout d’ la soupe à la carotte in paû dèclorâye. Vè n’ez pont mins d’âwe dè Javel dèdas, tout d’mîme?

        —     Aïe tâj’-te, là... Èl potiron, c’est n’pètite citrouille.

      I n’a faut m’ dè pus pou fâre réver l’Gabriel. I voit la citrouille dè la Cendrillon, i n’réve pu què d’ la gonzesse èt i s’mette à mîdgi sa soupe sas rin dère dè pus.

        —     Bin Adèle, foi d’Fifine, djè n’â djamâs sondgi à z’a fâre. V’ez eû ène sacrée idée!

       —     Djè v’bârâ la r’cette, Fifine. À c’t’heûre, i faurait ratade in paû, dj’â fât in rosbif èt djè l’îmans bin in paû roudge. Mâs, si vès l’îmez mieux bin cût, on peut l’ lâyi pus longtaps...

       Elle rèwate tout l’monde, mâs pachoûne n’è l’air dè moufter.

      Les frites atant bounnes. Èl rosbif fât fâre dès mmmhhh à tout l’monde. Èl Drole rèwâte aveu attention les trois- quate bouquets d’ail qui trînant das l’fond don plat. La Fifine lî fât les grands œils mâs l’gamin è don caractère.

        —     Madame Graudot, dj’îme bin l’aïl... Djè peux?

      L’Adèle nè l’ lâye mi n’aller pu lon. Aveu la quili, elle ramasse les gousses don plat è les tape das l’assiette dè l’Oscar aveu in grand sourire.

     —     C’est bon pou la santé, Oscar. T’ès bin râjon d’ les mîdgi. On doûrout z’a mîdgi in paû d’pus.

        —     Merci, M’me Graudot. Mi, djè m’a fârous pèter.

        —     Oyi, c’est coumme les ugnons...

        —     Allons, les afants, on n’va m’ bin sûr pûri l’dîner aveu des  nich’tries! In paû d’ tènue, vès n’atez m’ das la cour dè rècrèâtion!

         —     Layez, Fifine, la nature, c’est co l’meilleur monde!

     Là-d’sus, l’Alfred qui s’rèt’nout dèd’pûs in quart d’heûre, mâs n’osout boudgi pasque pachoûne nè l’rèwâtout, èt qu’sa mère lî avout toudjous dit qu’i n’follout causer à pachoûne qui n’vès r’wâtout m’ (sondgez in paû, là...) laûtche eune vesse sonore et d’vint routche coumme in coq. Èl Gabriel, qu’à ret’nout eune dèdpûs n’dèmi-heure laûtche la sienne pasqu’i riout, èt l’pauve Oscar n’è sû fâre autrèmat què d’mette ès grî d’prout das zou «conversâtion...» Coumme toudjous das ces cas-à, tout l’monde rèwâte tout l’monde èt pachoûne n’est coupâbe. 

    L’Adèle, qui coun’chout s’n’Alfred lî a r’toûne eune a lî dijant qu’i savout bin pouquoi. L’Alfred è’rwâte les deux invités èt s’dit qu’c’est tout d’mîme malheûreûx qu’i gn’è qu’lu qui ramasse eune baffe. Les deux autes chignant zou poire a s’tortillant su zou tchaise. La Fifine qu’è bin comprins a foutz eune bounne on Gabriel èt co eune à l’Oscar. Ça r’mette l’Alfred de bounne humeûr avant què l’notaire èn’ perniche la parole.
       —     Allons, les afants, in paû d’ tènue, tout d’mîme, quand on est à taûle. Djoseuf, in paû d’routche? Vès n’ez co rin bû.

      —   Djè dous dère què djè n’â m’ les encheures dè boire don si bon vin. Fifine, passe èm’ verre on Martial, va.

        —     Tè doûrous fâre atention, Djoseuf, tè vas berzinguer, t’à l’heure.

        —     Aïe ça n’fât rin, Fifine, djè n’dois m’ penre èl volant pour z’a raler...

       —     Oyi, mâs tè sais bin qu’ quand t’ès saû, tè n’tè sates pus èt tè t’mettes à tchanter n’impoûrte quoi!

        —     Mâs c’est bin, ça, Fifne, djè tchant’râ aveu lu.

         L’Adèle è r’wâti s’n’houme aveu d’la terreur da les œils. Quand l’Martial tchante, c’est coumme s’i pleuvout à la Saint- Mèdard, ça n’s’arrête mi.

         —     Vè tchant’rez après l’dessert, les hoummes. À c’t’heure, cè n’èst m’ el moumat.

         —     Bin n’roublî m’ el cafè, sinon on s’rait d’ la r’vue pour l’poûsse...

         —     Pou l’poûce? Què c’què c’est d’ça?

       —     Èl poûsse cafè, Fifine, c’est la p’tite goutte què les hoummes buvant après la jatte.

        —     Ben m’ Djoseuf n’a prend djamâs pont...

      —     Vès n’coun’chez m’ el Martial, Fifine. I fârout boire in chameau qui vint d’avaûler ses 100 lites.

      —     Ah nom dès djeux! On poûrait co bin r’nettir la berwette pou l’ratrer das la mâjon! Mâs dijez, Adèle, si vès n’ez pus d’famille dans les environs, on poûrrout bin fâre el rèveillon tchûz nous... Vès croyez qu’el Martial s’rout d’accoûrd?

         —     Djè li a caus’râ d’mî... si i n’è m’ trop maû la tîte...

      Èl Martial è tchanté aveu l’Djoseuf padat pus d’in heûre. Atère deux tchansons, i r’mettins n’pètite goutte das les verres èt i n’hèsitint m’ : cul sec!

       Il èt bin follu r’nettir la berwette pour ratrer l’Djoseuf dans la grîdge. La Fifine n’avout m’ envie d’ramassi l’mènu d’ la veille dans la cujine, èt il atout bin sûr qu’i n’arout sû soûlmat monter la preumîre mârtche des escayis...

 
* * * * * *

 Les compôsitions è les vacances!

 

        Èl Gabriel avout dit à s’frère qu’il v’lout bin l’âdi pou ses rèvisions. L’Oscar, lu, èn’ voyout m’ pouquoi c’qu’i vèrout dèrandgi s’frère pou ètudier.

         —     Tè sais, Drole, mi, djè n’avous pachoûne pou m’âdi, pour r’wâti si djè dijou djusse ou si dj’fayous bin. Pa des côps, on è pus âgi d’rèciter aveu in aute què tout seûl.

         —     Ben mi, djè r’wâte si djè n’m’âs m’ trompé tout d’chûte après qu’dj’â rèpèté...

         —     Cè n’èst m’ la mîme tchôse. Qu’est-c’què l’Doquet v’è fât r’voir, anû?

      —     Les calculs. On è vû les tâbes dè multiplicâtion djusqu’à 4. On dout les counneute par cœur. Et pûs on fât in paû d’additions et d’soustractions.

       —     Après l’marader, tè venrès près d’mi. Djè t’fâras fâre des calculs et r’dère tes tâbes.

        —     Aïe bin d’accoûrd.

         —     On fârèt ça tous les djous, la mîtant d’in heûre, après l’marader.

         —     L’Alfred, c’èst s’père et sa mère qui l’âdant.

        —     Ben oyi, Oscar, mâs tè sais bin qu’ les notes n’ant m’ atu assez à l’icole pour savoir fâre ça.

         —     I n’faut m’ loûs-i dère que tchûz les afants d’ritches, c’est l’père èt la mère qui âdant les afants. Ça loûs-i fârout d’ la poûne èt i n’mèritant m’ ça. Èt on èst mou bin aveu zoux.

        —     Ça, c’est bin vrâ. À t’à l’heûre.

         Quand l’Drole s’è assu à la taule, dèvant sa bolâye dè cacao, la Fifine è toûné la tîte pou n’mi montrer qu’elle avout oyi èt qu’avoir des afants aussi dgentis, ça lî fayout âque. Elle è atu à causer à s’n’ houme. I s’ant assus tous les deux, aveu les tripes nawaïes, mâs in grand bounheûr das l’cœur.

         —     Fifine, tè vois bin qu’mîme si on n’è m’ eû l’occâsion d’aller à l’icole, on peut al’ver des afants coumme i faut. On s’margaille pa des côps pasqu’on trouve qu’on n’fât m’ èç’ qu’i faut pou zoû èducâtion, mâs not’ rèsultat n’est m’ si mauvais.

         —     Djoseuf, djè sûs coumme vous. Ça m’fât âque d’oï nos deux gachons ainlà. I m’sène qu’à c’t’heûre, dj’arâs pu âgi d’travailli pou zoû av’nir, ça m’paraitrait moins loûrd.

         —     Allèz, Fifine, in faut m’ ès’ lâyi n’aller... Les bîtes èm’ ratadant è v’ez co les lègumes à nettir pour l’souper...