Écouter l'extrait...

    —    Merte, qu’i s’è dègrougni l’inspecteûr, La Mamine èm’ dijou doudjou d’penre in tchapî ou in prapuie, quand elle avout co toute sa tîte.

    L’inspecteûr Botroûle n’avout djamâs choûté la Mamine, sa mère, qu’i-l avout toudjou d’moré aveu.

    Es’ marier? Wâye, pouquoi, don? Djamâs à la mâjon quand i faurout, avoir des afants qu’i n’poûrout alver qu’quand il arout in pau d’taps, à l’occâsion? Ça n’lî  r’sènout-m’. Ète cèlibataire, c’atout djusse èc’ qui lî follout èt i n’ lî avout rin arrivé das sa vie pou l’ fâre tchîdgi d’avis. Mîme si les feummes lî plâjint bin, i n’avout djamâs découvri LA çoune qui lî convenrout. Et i n’avout wâ l’air d’a-n ète dènorté.

    Pou l’ resse, on peut dère qu’i-l atout columbien, aveu in «u». Capâbe, vîe bagnole, impermèâbe dèmaj’lé. El dètail à la fin d’la question qu’i posout... Mâs l’Columbo, lu, atout lieut’nant, lu, i-l atout inspecteûr. Sa Coccinelle varte ès’ fayout r’marquer pa d’tavaû. Il avout bin tchartchi n’ Peugeot dècapotâbe, mâs la çoune qu’i-l avout trouvé n’arout pu sû roûler.
    Botroûle. On avout bin essayi d’lî fâre tchîdgi s’nom, mâs quand on l’è êu d’in père qu’atout hounnîte èt bin considèré (in quincaillî qui coun’chout l’mèti èt c’qu’i-l avout das s’ magasin coumme pachoûne!), mîme si on s’hutche Albert – Al, bin atadu pou les çounes qui travaillant aveu lu èt pou les djournalisses – on l’wârde èt on veut qu’i souche respecté.

    Pou l’côp, l’inspecteûr bizout dèsous la mousinette tiède don tchu d’ l’èté. Ben oï, èl patron lî avout d’jà dit deux trois côps què d’ vènu au bûreau à pids putot qu’en auto qui lî fayout pîrde tout plî d’taps pou les enquètes qui n’pèlint rattade. Mâs merte, à la fin! I n’lî follout qu’cinq minutes pour z’a raller à la mâjon èt sorti s’n’auto don gâradge. Alors, qu’on lî foutiche la paix!

    I-l è poussi l’huche don commissariat a breulant Salut tourtous!, è tapé s’n’impermèâbe su l’radiateûr dè s’bûreau pûs s’est lâyi tchûre das s’fauteuil a laûtchant  n’reûpâye don tounnère.

    —    Ça vèrrait, Mossieur Al?

    Il è atu saisi.

    —    Capucine! Djè n’vavous-m’ vû. Djè v’dèmande bin pardon...

    Pp 5,7 et 9 (partim)

Haut de la page