Page 36 - Odeur des risons
P. 36
34
La moût das les bos
Das les bos, les buchons, les feuilles toutes cardjolâyes
Sous les fruchons trablant, criant des lârmes dè plôve!
Elles criant su zoûs sœurs qui purichant les paûves,
Cadaves souillis p’ aux pas, das les sates, les ollayes!
Elles criant su zolles-mîmes avant d’ tchûr aux voyettes
Et la messe d’ atermat la tchante el boquillon.
Dè zou darin voyadge, l’ rinzinzin des soyettes,
L’ vat qui les bîche a fant n’ proum’nâde dè papillons!
Avant dè s’dèhuquer, su l’ agounie d’ zous feuilles,
Les âbes lâyant chaper des bounes grosses lârmes dè deuil :
Des tchînes pleuvant les glands et des hates les faïnes,
D’planes èt d’ frânes les hèlces; des mèlzes, les alines!
Coumme des queurés vitis, raplichant zou mission,
Les carbeaux, les cornalles crâquant des litanies!
Aux chevreux, aux sanglés, aux p’tits djonnes das les nids,
Dijant «Vèci qu’ va v’nu la fleur dè soumission!»
Au çoum’tière blanc des feuilles, das zous fosses arouîllites,
Au brut d’ in côp d’ fusique, des sapins cè s’ rè l’ tou
D’meler des lârmes dè neidge el tra qu’ aux alentous
Crèch’rè in doquet roudge fât don sang d’ ène pauve bîte!
