Page 16 - Ses oeuvres - Marcel Moreaux

LA NOCE

D’ju vins tchiûz vous, Marie, c’est pa curiôsitéi;
Des not’ tchiûz an n’voit rin, an z’est bin embêtéi.
Ètère, ça vaut la poûne, i paraît qu’c’est n’belle noce,
Ils ant fât, dj’a seûs sûr, pus d’trente galettes du blosses.
Bin ça va couter cher, ca rin quü des gigots,
L’boutchi a-n è porté au moins cinquante kilos.
An dit méme qu’i-s ant fât ruv’nu du vrai champagne.
T’es bé dère, là, c’est bête, pou des p’tites dgens d’campagne
Les v’là qui débusquant; catchis drî les rideaux,
D’ju n’ nous fârans m’ passer pou des vulgaires badauds.
El marié, si dj’tins bin, fât l’commis voyageûr,
I gagne toudjous autant quü s’i-l atout chômeûr.
Ah! l’vara, c’est n’grosse noce, is sant au moins vingt coupes
Gn’è plusieurs apairatches du trois au lieu d’ête doubes.
Wâte, les hoummes ant tourtous in nû tchiepé melon.
C’est la môde là, ma fîlle, des les grandes occâsions.
Ô ca belle, la mariéi, coumme ça la flatte, noume don.
An dèrout eune gamine qui fât sa coumminion.
Pour lî, c’est in bé djou, mais pourvu qu’elle priyiche
El bon Dieu pou qu’ longteps çu bounheûr-là deuriche.
C’est coumme nous, là, ç’djou-là an z’atout ritche assez
Mais les rûjes nu sant m’ longs pou ête vite tracasséi
Rwâte bin la fîlle d’houneûr, elle est ach’té sa cotte
Des n’grande mâjan d’ Bruxelles; qué coupe, coumme ça dègotte.
I gn’ è qu’ la ville quand méme pou avoir d’la dègaine
Wâte la cousine du Lîdjge, si an n’ derout m’ la reine.
Avu l’ceu qu’an lî è mins, an vôrout la marier
Mais c’est in amétchiatge, dju n’vois m’ co ça règléi.

16