Page 12 - Ses oeuvres - Marcel Moreaux

AN TUE L’ POUCHÉ.

An s’est levéi matin, dédjet bin avant l’ djou
À poume arait-an prins lu teps du s’dère bondjou.
Les gosses, pèné-volant, dèchèdant du leus tchiambes
Des handés des les bras, pou s’taper des les d’jambes
Des parents qui sant voûyes discuter à l’ètaûle
Lu poids du pouché qui s’est dressi d’in coup d’gaule
Poupa, bâye lu gamin, voul’là dédjet, l’tueui.
Noume dan, maman, bin sûr qu’ c’est mi qu’arè la queui.
La p’tite n’est m’ co si frantche à voyant la souyette
Èt l’grand couté lûgeant qui tûrait la tchiourette.
— Bé gros, tu testament, si n’est dictéi, r’umû-te.
D’ju crois bin mon vara qu’c’est l’darnî côup quü t’rûtes.
El pouché des l’aran s’est fât mette à la patte
La côrde qui va servi su l’pavéi à l’abatte.
I prévoit, pa l’instinct, sans doute quü c’est sa fin
Ca du l’oï breûlei, v’là eune bande du gamins
Autou du la victime... c’est l’heure du sacrifice.
L’animal est pûgi; el sang tchiaud tout roudge clisse
Des la péle quü la mère tint in poû à trèblant.
V’ez bé dère, voir souffri, ça r’mue les sentiments...
El pouché è râlei; à ç’t’heure el père est voûye
Quére deux grosses bottes du paille pou li brûler les soûyes,
Les afants, aradgis, v’nant hatchi les inglettes
El teps qu’en z’a boit eune avant d’fâre la toilette.
C’est après quü l’pouché à bouquets dècoupei
Va garni l’ grand saleu, pou ête pitit saléi.
An va co s’a fourrer in moment eune belle bosse
Pou attraper la hite... coumme au lend’mé des noces.
En bârait, c’est la mode, à ses milleurs voisins,
Quand l’vète n’a voûrè pus, lu resse du ses boudins.

12