La cossète su l'tèché Albert Yande Poèmes Les Cahiers Wallone, Namur, S.D.

Écouter l'extrait... dit par l'auteur La vouyette Dju m’souvins d’eune vouyette qui dônout drî les méches Peûs cheujout des holières èt s’mussout d’dès l’bochet. Dju m’y vois co couri, achôrant les mouchets Pou z’y cude des meûrans, des pernelles èt des fréches. Dju m’souvins d’eune vouyette Et n’sacante côps, dj’la r’grette. Dju m’souvins d’eune vouyette, atère les neujètis Qu’an cheujout tout gamin a r’vunant des ècoles. I fayout mou bon qu’pa des côps les djônes droles Pou z’y voir les djônettes y triplint co v’lèti. Dju m’souvins d’eune vouyette Et d’eune première boutchette. C’est pa çute vouyette-là qu’in bé côp dj’â parti... M’â-dj’ rutôné des côps pou voir la mai du m’man Qui d’au lon m’fayout signe du méche drî la mâjan : Les m’mans sont mou a sougne à voir quitter leû p’tit. Et dju m’souvins d’eune vouyette Qü dj’m’â r’trouvé tout’nette. Ah coumme dj’atous bin-âje rin qu’a r’voyant d’au lon El tûté d’la mâjan catchîe d’dès les peumîs Et l’méche, dan, aveu M’man qui cherbout ses arîes A m’ratèdant, noum’dan : elle avout l’tèps si long... Dju m’souvins d’eune vouyette Où c’qü d’jmartchous bin raide. P’pa èt M’man atant voûyes, l’Ban Djeu lès è r’hutchis, Mâs dju r’prins co v’lèti la vouyette drî les méches. Dj’y r’vois co n’sacante côps des afants cude des fréches Et pou s’y rabrassi, dès djônes dgens s’y catchi. Mi, d’jy r’vique ma djônesse èt tchèque côp drî la hâye, Dj’m’r’tônè pour tchertchi in tuté, eune feumâye Et co n’mai qui m’f’rout signe, dju n’sais co m’apétchi... Dju m’souvins d’eune vouyette... Gn’è m’ in djou qu’dju n’la r’grette!

Haut de la page