Page 39 - La boot dè sau - Cafè Suisse

Ç’atout in bin brâve houmme, foût poli qui v’dijout toudjous bin
bondjou ’t a hossant la tîte putot deux côps qu’inque. Et meus’ré,
aveu ça. I martchout toudjous don mîme pas, mi pus grand, mi pus
vite d’in djou à l’aute. I l’arout eu in gèomète das ses ancêtes què dj’
n’ a s’rous m’ pus èchauré qu’ça.
Sa grande manie, c’est qu’a passant d’vant la mair’rie, l’îcole
communâle des gachons si v’ veulez, i’ s’arrêtout pou rwâti les dègrés
qu’ i fayout au thermoumète. Ène manie qu’ l’Adrien Tchaplet et mi-
mîme avans wardé.
Bref, el djou què dj’ veux v’causer, l’ Oscar avout dindjà passé pou
n-aller au lât èt s’avout mins en r’târd : i-l avout ètu dère bondjou au
Leyon èt à la Julie, ses cousins.
El tra d’ça, les huches dè la mair’rie atint grandes au lârdge. El
Gaston Frisch, l’appariteur – in m’ti qu’ les Bruxellois d’ la Statistique
èn’ coun’chant, dj’a sais âque – s’ avout mins su s’trente èt un èt i
s’dèmalotout, ès’ dègrougnout ’t a s’dèmounant après les clitches
dètraquâyes des portières des grosses bagnoles amèricaines pou z-a
fâre sorti les mariés èt zoûs invités d’ la noce. À Saint-Mâd, el mâre èt
mi-mime n’avins djamâs vu âque inlà! Paç’què pou n’noce ç’atout,
l’vara, ène sacrée noce. Les hoummes atint vitis aveu des fraques, des
quoues d’alonde – qu’ i-l avint loué – et les feumes, zolles, atint minjes
aveu des longues cottes qu’ i n’y a n-avout mîme qui triplint d’sus.
El deuxième dè mes apôtes, l’Edouard dè la Camille Goditche,
rèwâtout l’tralala, rouyant des œils coumme s’i-l avout vû l’daru,
choufflé, abachourdi, boutche grande douvîsse qu’on arout pu croire
qu’i-l oyout djeurer l’queuré Bion, assorcèlé èt pourtchessant la
Rosalie.
L’ Edouard n’è sù s’apîtchi d’n-aller r’quîre sa feume qu’ avout raté
n’parée occasion d’canler, tandis’ què la Laure dè l’ Ulysse atout,
coumme à toutes les noces, plantâye au premi rang d’ la galerie (i’ faut
v’dère qu’elle n’atout m’ pus grande qu’ i n’ follout).
Rabisant das la rualle dè l’ icole, l’Edouard ès’ tape das l’ Oscar qui
r’vènout aveu s’bidon d’lât èt lî baille : «Oscar, t’ ès vû à la mair’rie,
c’est coumme à Monaco!» èt l’ Oscar dè r’ponde : «Oïl, i n’y è trente-
trois dègrés!»
Ène tchaude djournâye, coumme vè plez voir!

37