Page 31 - Marcel Moreaux-oeuvres-1

LU TERADGE AU SÔRT

Vus v’a souv’nèz du djou d’Saint-Blaise,
Quand les conscrits tèraint au sort.
Quand sés malice èt sés adresse
An s’foutout d’dès ou pa tchance, hors.
A ç’moument-là, ç’atout recta;
D’la nèdge i gn’ a n’avout des tâs.
Au premi train, à Sainte-Marie,
Étant gamin, dj’alous au d’vant
Du la Maria, d’la grosse Marie
Qui, m’affublaint du grands rubans.
In paû après, musique en téte,
Passaint, a tchantant, les conscrits.
Coiffès tchèquin d’eune nieûve casquette.
Les sœurs, les frères cheugeaint pa drî.
A-n arrivant d’vant Saint-Antoine,
Pou ète bon, an lançout d’dès l’tronc
Gros sous èt francs. Note heureux moine
Souriout bin sûr du voir ces dons.
.....................................................
An plondgeout d’dès l’bocal en verre
Maugrès – tout avu tremblement...
P’tit numéro... bon pou «la guerre»
Mais in gros chiffe, v’atins exempt.
An voyout co vite à leu mine
Les ceux qu’avint tèrè bin mau.
Il’s atint pus plat, ça s’duvine
Qü les bons, à sortant du bureau.
Mais tourtous ach’taint aux martchandes
Rubans d’couleurs èt numéros.
Peus, an partout, tchantant, en bande.
«Et à la guerre»... coumme les héros.
Trois djous, an fêtout lu teradge.
Du bâhi, an n’savout pu craquei,

-31-