Page 8 - Feux-d-holieres
P. 8
Rôtadge
Pou l’houmme qu’è trimè tout l’lang d’la voûye,
Aveu ses s’los, ses rûjes, sès plâjis èt sès pônes,
V’là qu’in bé djou, c’est l’tchu d’la roûye.
I peut dèt’lèr, gn’è pus pèchône
Pour l’coummandèr ni l’ècoûtèr :
I-l è fât s’tèps, i peut s’rôtèr !
L’è-t-i mout des côps dit qu’i s’rout bin sûr binâje
Du rête libe coumme in djône, du r’viqui à sa môde
Èt du gros lîve des sougnes, tônèr la dârnière pâge
Peûs l’rotchi voûye pou d’ban aû d’zeur du la coummôde
Èt s’a-n allèr èt n’mi trénèr
A r’montant l’tèps sés s’rutônèr.
L’arminac’ adeumâye n’è p’t-ête pus mout d’fuillèts
Èt l’bounheûr à ç’ t’âdje-là, ça s’médje à p’tites goulâyes.
Pou z-a r’trouvèr la peûle, gn’è co qu’les viès cayès
Èt leus mancés d’souv’nances pa t’ t’ avaû èchamplâyes.
L’houmme est binâje du les r’trouvèr
Èt pus d’in côp les ravètèr
Avant qu’i n’duviche s’apantèr
Pou s’a-n allèr, les pîds pa d’vant,
R’trouvèr les cés qui l’rattèdant
Èt, pa d’léz zous, pou d’ban s’rôtèr.
8
