Page 41 - Odeur des risons

39

Ètoiles filantes

Das la nûti d’ äoût,
S’rout-ce in fû d’ artifice,
L’ doquet qui dèclaubisse
Les ètoiles tout autou?
Ou pètons hours la foûrdge,
Ètincelles su l’ acleume,
La clissâye qui s’alleume,
La plauve couleur des oûrdges?
Où t’ catch’-te don marchaû
Das la nûti d’ äoût?
Drî la lune blantche d’ atchaux
Ou bin alours èdoù?

Don voyadge què zoûs sœurs
Fayant pou not’ plâjî,
Pa milliers les bougies,
Echaurâyes, trablant d’peur!
Èt ç’telle-làte qui cleumète
Djeur’rout dèdas sa frousse
Qu’ l’ è risé d’ sa quoue rousse
Èce qu’elle croit ène coumète!
A node el choûfe don fû,
Ène aûte ès’ voit grillant
El tra qu’ a fant in vû
Les boun’ amis riant!

Et la lune aussi rit!
Mais la bête, djè parie,
N’ pîrde rin pou rawarder!
Si des ètoiles filantes,
Elle n’è m’ foût à s’ warder,
Hoûrs des machines volantes
Qu’ elle è racalodgi,
Sort’rè, in caup ou l’ aûte,
In choûgnâ cosmonaute
Pou das l’ œil lî lodgi
Ène gaûle èt s’ carré d’ toile :
La bannièr’ aux ètoiles!