Page 37 - Odeur des risons
P. 37
35
Les sondges d’afants
Les sondges d’ afants qui vant l’ cul nu,
Rêves dè pouillons qui sortant d’ l’ u
N’ ant pont d’ passé, n’ ant pont d’ rèmoûrds!
I’ sant l’ ciel blu, l’ rèchi d’ âwe fraiche,
La rose dè sang qui das m’ mèche crèche,
L’ tchant don loch’not quand el djou s’ moûrt!
Les sondges d’ afants rêvant d’ la lune,
Al’ aventeure, fi d’ la fortune,
N’ ant pont d’ passé, n’ ant pont d’ rèmoûrds
À franc collé, avûles d’ audace,
Ponts d’ Luxembourg houppant l’ espace,
Bouvant la vie, quieule à plîs boûrds!
Les sondges d’ afants qui fant la guîrre,
Au sabe dè bos s’ battant pou rire,
N’ ant pont d’ malice, n’ ant pont d’ rèmoûrds!
Boûgnes ou mitchots, pirates, corsaires,
Soldâts, cow-boys ou mousquètaires,
C’est pou don beurre qu’on s’ tue, qu’on moûrt!
Djusqu’ au djou doù aux p’tits des hoummes,
I’ les y prend deurant zou soumme,
Dèdas zous sondges coumme das zou vie,
Dè fâre don mau, dè fâre don toûrt,
I’ les y vint d’ hargnôles envies!
D’ fruchi, d’ hagni ant-i don r’moûrds?
