Page 28 - Odeur des risons
P. 28
26
El carroussel à tchaises
I-l avout m’ n-âdge, Blaîse, ém’ voisin,
I’ passout m’ quîre à toutes les fîtes!
Su les tch’faux d’ bos, dj’ daûnins d’ la tîte,
L’ oûrgue dè ramôre ès’ rinzinzin!
Dj’ avins neuf ans, mi, m’ voisin Blaîse!
I n-y avout v’nu èç’ t-annâje-là
In carroussel aveu des tchaîses!
L’ oûrgue dè ramôre ès’ tralala!
Dè monter d’sus, dj’ ans bâdivé,
Djè n’ ans n-osu, su place rivés!
Les autes tounint sans fin, sans frein!
L’ oûrgue dè ramôre ès’ mîme refrain!
Tirs, balançûs, lot’ries, baraques,
Rin n’ nous dijout, dj’ restins en raque!
El Louis Pilûte à la mènique,
L’ orgue dè ramôre sa pauv’ musique!
Avant qu’ froumiche el tourniquet,
Djè nous ans dit : on s’ rattrap’rè
À la grand-fite, trois mois après!
L’ oûrgue dè ramôre s’ darin bouquet!
En août est moût èm’ copain Blaîse!
À la grand-fîte, i’ n’ è m’ atu
Au carroussel aveu des tchaises!
L’ oûrgue dè ramôre s’ turlututu!
Scottish èt valses èt co polkas,
El cœur sârré, dj’ les â oyis,
Tout seûl sas l’ Blaîse, les œils noyis!
L’ oûrgue dè ramôre ène mazurka!
