Page 30 - Odeur des risons

28

Les Tornusses

Atout-ce en mârs ou en avri?
Das les talus èt l’ long des hâyes.
Dj’ nous a-n allins, après n’ horlâye,
Aux djargôgôts à poûne douvris!
Si d’ cette tchesse-là dj’ ratrins berdouilles,
Nous dèchèrant das les travières,
Dj’ allins cramer la fausse rivière
Dè sa came varte plîne dè guernouilles!
Mais les tornusses don taps qu’ les gosses
Atint tourtous ène miette vatchis,
An’hû qu’ l’ îcole raclôt les gosses,
N’ y è pus pachoûne pou les tchartchi!

Aveu l’ pani èt in coûteau,
Aux pichalits ou au cresson,
En plî mois d’août aux aubussons,
Dj’ nous enfilins les pateureaûx
Ou bin dj’ glènins, l’ long des voyettes,
Gratte-cul, pètchettes ou cornuales,
Sas roublier meûres ou pernales,
Nujettes rapli des viés toyettes!
Mais les tornusses don taps qu’ les gosses
Atint tourtous ène miette vatchis,
An’hû qu’ l’ îcole raclôt les gosses
N’ y è pus pachoûne pou les tchartchi!

Pou y cueilli l’ muguet en mai,
Pus târd, les fraîjes èt les ampoûnes,
Di’ grimpins au bos, à couche d’ haloûne,
– Quand’ dj’ arrivins, di’ atins pâmés –
Les grand pansârds sougnant zoû vate,
I’ rallint co pa d’ lez la Sate,
Inque aux girolles, l’ aûte aux morilles,
Erdèvolant p’ au Tch’min Morî!
Mais les tornusses don taps qu’ les gosses
Atint tourtous ène miette vatchis,
An’hû qu’ l’ icole raclât les gosses.
N’ y è pus pachoûne pou les tchartchi!