Page 31 - Odeur des risons

29

Cè n’est qu’in pèle, ma foi!

Cè n’ est qu’ in pèle, ma foi, in pèle coumme tout-plî d’ aûtes!
Das in coin, n’ grande aumâre, presqu’ aussi lârdge què haûte,
Dèzous la suspension, aveu s’ tapis à frandges,
La ronde taûle quis’ rèplouye; deux, quat’ six tchaises dè paille,
L’ fauteuil droit dè v’lours roudge, què pa des côps l’on pentche
D’in déclic à tchaque bras, quand on n’ sait pus trop haye!
Cè n’ est qu’ in pèle, ma foi, rapli d’ la doûce tchaleûr
Qui s’ dégadge èt s’ rèpade don fourni à coulounnes,
Aveu s-n hourlodge ancienne qui toque èt boque èt soune,
Qui m’seure, dècaupe la veille èt la dèbite en heures...

Dèlez la taûle assûte, ène aguë das s’chignon,
Lî, la mère, elle tricote – ène écharpe? ène bounette? –
A portée d’ sa mî, n’ quieule : sa tisâne dè sûgnon!
Pus lon, n’ boite dè Valda toute raplisse dè nounettes,
D’ aguës à rassarsîr melâyes à des alines;
El blanc filé, el noir, djûmîs su zoûs bobines!
Pûs, par tîre à ses pids, das n’ vié boite en carton,
Les p’lotes toutes cardjolâyes què taquine in tchaton!
Et la mère compte ses mailles èt l’ hourlodge compte ses trantches!
Cè n’ est qu’ in pèle, ma foi, où veillant deux bons vieux
Qui pourrint êt’ pus maû coumme i’ pourrint êt’ mieux...

C’est put-ête èçe què rûte el père das sa bârbe blantche,
Bronquant dèri l’ fournî, tout-a tessant sa pipe!
D’ temps en temps, i’ la r’boûre au paquet d’ Thoumas Ph’lippe,
Èmette in bos das l’ fû, les çades rauclâyes au d’vant
El tra què l’ tchin n’ sèconde, oûvît à poûne in œil
Pou l’ rèfroumer auss’tot, s’ radormi t-a rêvant
Aux grandes tchesses dè d’das l’ taps, plînes dè sanglés, d’ chevreuils!

Cè n’ est qu’ in pèle das l’quél i sène què l’ heure s’arrête,
Où les bruts d’ tous les djous ès’ fondant das l’ silence!
Mais l’ hourlodge fât ses comptes, pou ête bin sûre, rèpète!
Qu’ v’ atinche ène miette pus vî, r’wâtez-la, ‘ll’ sè balance!