Page 13 - La boot dè sau - Cafè Suisse
P. 13
La galette dè ç’rîjes
Souvat prins pas l’ envie,
Dj’ â hagni das la vie
Coumme das n’ galette dè ç’rîjes.
Aveu ses nouyons d’das
– Dj’ y â lâyi quèques dats –
La vie, galette dè c’rîjes,
Ène vraie galette dè rois,
M’atout n’fîte à toute heûre
Èt la fève don bounheur
Toudjous èm’ rèv’nout d’ droit.
Soul’mat, oïl, vèlà,
I-l est bin lon, ç’ taps-là!
An’hù qu’ma vie cahotte,
An’hû què m’tchî ahotte,
Si djè r’wâte pa des côps
Pa drî mi la longue roûye
Què m’ fant mes annâyes voûyes,
Mes djous, djambes à zoû cau
Qui ant filé bon train,
P’au passé avolés
Coumme les poteaux p’au train,
Djè m’ dis què dj’ sûs volé.
C’est ça, oïl, vèlà,
I m’ est volé ç’ taps-là!
Pusquè, téle l’ âwe das n’ banse
Les annâyes on n’ racatche,
Qu’ on n’ rafroume mi das n’ cadge
Don cœur les viés bombances,
Pou les r’viqui, djè fugne
Ma mîmoire – mais a vain.
Das ma pauve tîte ès’ cugne
El pau d’tchôse qui m’rèvint.
Jeunesse, galette dè ç’rîjes
Est bin moûrte à m’ n-âme grije!
Deux côps, oïl, vèlà,
I m’ est volé, ç’ taps-là.
11
