Page 18 - La boot dè sau - Cafè Suisse
P. 18
El qua-mourant
Quand l’ qua-mourant è pette ou vesse,
I peuse, meseure sa p’tite santé.
P’aux mauvais roûgnes, pourchû, hanté,
Est sûr d’ avoir rin moins qu’ la pesse,
L’ misèrèré ou l’ cholèra!
Grignant, chignant aux moindes douleurs,
El qua-mourant aflant s’ malheur
A fât in drame, in opèra.
Dè sa boud’lette gonflant les maux,
Es’ voit dindjà rauté, netti,
Brantche dè paquettes das l’ bèniti
Pûs su sa fosse, v’nus les Rameaux!
Coumme s’ i-l atout pa d’vant la moût,
N’ faurout m’, croit-i’, chouffler bin foût
Pou qu’ s’ èteindiche sas courant d’air
D’ sa vie d’papi el rèche dè fû,
D’ sa vie d’ bougie la mèche dè chû.
Pourtant note houmme viqu’rè cent’naire
S’ flot dènawé toudjous r’nawé
S’ coûchî d’ vachi djamas clawé!
16
