Page 16 - La boot dè sau - Cafè Suisse

Au pas d’l’hivîr

Au pas d’ l’hivîr qui vint, qui s’mette à rabiser,
Djouette, el vat d’plôve hoûle, rachigne la flûte, miâwe
Coumme el tra d’ la nûti, d’vant la tchatte el mirquâwe,
Ployant, rauclant ou bin én’ fayant què d’riser.
Des étangs, des dormants l’âwe d’habitude pâjelle
D’ ête inla hourbalâye a-n est prinje dè fruchons.
El petit djone, coiyi das la hâye ou l’buchon,
Pauroux, pleumes rétroussîtes, n’ osant tchîpler, trabelle
Et les feuilles moûrtes roûlant, valsant pûs s’arrêtant;
Fines sottes, saules, on s’démande, s’arrêtant ét r’partant.
Au lieuve dédas sa forme, éne chuâye court l’ échine;
S’ èchaûrant les boulîs, les planes, les grands pouplis
– Ant-i oyi des tchînes, ant-i vû des draps d’lit? –
Des hîrbes, des âbes, des bîtes, el vat d’plôve dé tout s’chine,
S’pernant au djû, r’doubelle, fât l’ loup, à moût hurèle
D’zous les huches, p’aux tchim’nâyes, s’attaque mime aux mâjons,
Fât crier les afants à z-a pîrde la râjon.
Mais tout d’ in côp, la plôve, fradgeant les câreaux, trelle.
Les f’nîtes dégoulinant, douç’mat, d’pus en pus vite.
El vat, muj’lé, ès’ tât, n’è pus voix au chapite!

Vieillesse, dè l’âdge l’hivîr, té vins, accours, rabises.
D’in méche aux bis âris, té fâs d’ la vie in trûche.
Avûle coumme el vat d’plôve, sus t’passadge tout t’ravaches
Èt choûrde autant qu’avûle, santé coumme ène sau t’rises
Djusqu’ au djou doù, sas mîme toquer à l’ huche,
S’ amoûne la maline gale bailli l’ darin côp d’ bruche

14