Page 31 - La boot dè sau - Cafè Suisse

La niquâye dè pouch’lons

Est-ce què v’ ez bin coummeu l’ Louis? A-n n’ez v’ soûl’mat
dindjà oyi causer? Non-est! I n’ s’adgit m’ don nonon don Cola
Bâbisse, el Louis P... Èç’ té-cite est pus célèbe, djè n’ dis m’ el
contraire. Surtout d’pûs la rèponse qu’ i-l avout fât in djou d’ Te
Deum à note vicaire, l’abbé Frère el bin noummé! El nonon don
Côlas, qui toûnout la mènique dè l’ ourgue à l’ èglije, èce djou-là atout
ène miette hodé, la messe n’ a finichout m’, èt coumme l’ âdant don
queuré d’mandout à notre Louis des nouvelles dè sa santé, i’ s’avout
vu r’ponde «Plî I’ c..., M’sieu l’Abbeîe».
Non-est, non-est! I n’est m’ question dè ç’ Louis-là. El çoune què
dj’ veux v’ atrèt’nu atout peinte dè s’mèti. Mais sa rèputâtion lî v’nout
putot dè ç’ qu’ i’ v’racontout des flauves èt des aûluges à longueur dè
côp d’pinceau. I causout don vate, èv’ fayout des tous d’magie.
N’avout-m’ t-i in djou fât cranse dè s’pade! C’ est v’ dère l’ oiseau qu’
ç’atout!
On l’avout don d’mandé in bi djou das n’ferme dè Mussy pou
mette ène coûtche dè couleur aux f’nîtes. Coumme i n’avout pont
d’engin d’ locomôtion, i pernout toudjous l’train èt i’ n’tchoijichout m’
ès-n heûre. I s’ amoûne en pli midi djusse coumme nos dgens vènint
dè s’mette à taûle, la soupe aux ugnons das les assiettes. On l’invite
bin sûr, mais coumme i n’ court mi après la soupe aux ugnons à cause
dè la firâwe, i prètade qu’ i-l è midgi das l’train.
La soupe avolâye, on sîrve ène platernâye dè biquin, el plat favori
don Louis. Djudgez d’la mine qu’ i tère! Rin qu’ l’odeur li baille in
crûx à l’ estoumac’. I passe pa toutes les couleurs, don roudge au
djaune, don djaune au vart, don vart au blu. Quoi d’ètounant pou in
peinte, djè n’ vès l’ fàs m’ dère. Aveu ça, i-l est tell’rnat abachourdi qu’i
n’ pète mi bouffe!
El fermi s’a rade compte èt l’attaque: «Bin, Louis? Y arout-i âque
qui n’ va m’? V’ atez tout drole on dèrout? Vès n’crâlez m’! On rawâd
pourtant la darinte dè vos flaûves!
«Oh, rèponde el peinte qui saute su l’ occasion. «I nous a-n è
arrivé ène bin bounne la s’mîne passâye. Figurez-v’ què note treuye è
fât treize pètits pouch’lons.»
La feume don fermi, mi pus èchaûraye què ça, dèclare què ç’ n est
m’ impossib’ èt mime qui n’y è rin d’drole à ça.

29