Page 14 - Odeur des risons

12

Ma bounne grand-mère

La misîre su la tîrre s’ a prend à tout tchaquin,
El deuil n’ èpoûgne pachoûne : ritche, paûve, hounnîte, coquin!
Mi, ma grande poûne m’ è v’nu à la moût d’ ma grand-mère!
Là dj’ a crié d’ tchagrin quand’ elle s’ a-n è allé;
D’ mes œils coulint les lârmes têles guè deux r’chîs salés!
Trop losse pou les chuer, tout dolant, l’ cœur amer,
Dj’ m’ â coyi das ma tchambe, pas’ darin mot pourchû :
«M’ pauv’ afant» m’ è-t-elle dit, avant què d’ pîrde counchance,
T a n-atch’fant dè s’ règârd : «Djè n’ à pus la moinde tchance!»
Ainsi sa vie deurant, pas-à-pas, elle m’ è chû,
Veillant su ma bèquâye, su l’ qui-vive pou in rin,
Sas sondgi à li-mîme, coumme ène bounne brâve mère pouille!
Elle s’ arè tracassi, djusqu’ au moumat darin,
Peur dè m’ lâyi tout seûl, livré à la harouille.

Pou t’ assev’li, grand-mère, èt’ n-houmme, el paûv’ François
T’ è mins tes bîs handîs, ét’ casavec dè soie.
Djè m’ dèmande pa des côps si pourtant das t’ cercueil,
On n’ arout m’ du t’ viti, pa d’zeûr ta pus belle cotte,
Des banettes, des couchus què t’ mettous l’ inque su l’aûte.
Djè crois vlati l’ Saint Pierre bin luné das s-n accueil
Aux çoux qui s’ sant sîgni, aux simpes èt aux ouvris.
Mais sûr, coumme djè t’ counneus, t’ arès eû èt’ sourire
Èt l’ huche don paradis tout seûl s’ arè douvri.
Ti qui croyous aux andges, das la musique, les rires,
Tè n’ arès eû qu’ d’ atrer au mitan des braves dgens!
C’est tout l’ bin què djè t’ souhâte, mi, èt’ pouillon, èt’ Djean!