Page 18 - Feux-d-holieres

Bâl du djônesse

Wâye bin sûr qu’an s’croit fèl tout l’tèps qu’an cheût l’tropé
Èt qu’an s’rafie du l’cheûre aû pus lang sés crantèr.
Mais où allez-v’, grand Djeu, aveu ’ne fleûr aû tchèpé?
Oye, aneû c’est dicâsse mais ç’ n’est pus coumme dès l’tèps.
Oû vôrinz-v’ co couri pou r’trouvèr vôs vingt-ans?
Croyez-v’ co qu’an v’ratède au grand bâl du djônèsse
Èt qu’i gn’è qu’à v’mantrèr pou qu’an v’saûtiche au cô?
Mais vormèt, v’clambotchez èt vos tch’feûx sant tout blancs.
V’ n’ez pus d’halône nan pus pou sandgi qu’ça r’coummèce,
V’adeum’rez p’t-ête la danse, mais vous n’houp’rez m’ bécôp.

Zim-boum larigou, pan-pan lariguette
R’wâtans d’dansi, cré loup-garou
Tous les djônes droles èt les djônettes,
Zim-boum lariguette, pan-pan larigou!

Wâye, bin sûr quu ç’ n’est pus les djalônes du d’dès l’tèps,
Ç’ n’est pus la grosse musique ni les airs des aûtes côps.
Èt an n’s’y r’counnut pus, an z’è bé ècoûtèr
Gn’a-n è m’ inque qu’est foutu d’nous raguèyi bécôp.
Oye, an z’è bé couri pou r’trouvèr ses vingt-ans
Èt sa preumière aimeûr aû grand bâl du djônesse,
Aveu l’cœûr à la bringue èt la fleûr aû tchèpé.
Les vis airs des aûtes côps, çu n’est qu’à s’les rût’nant
Pou lu-méme qu’an les r’vique èt qu’an s’rutroûve d’adresse
Pou rapougni s’bâtan èt voir dansi l’tropé.

Zim-boum rindindu, pan-pan lariguette
Dansans tourtous, cré nam-di-blu
Tous les djônes droles èt les djônettes,
Zim-boum lariguette, pan-pan rindindu !

18