Page 20 - Les paumes su les èteules

En hommage à M. le Baron P. Nothomb,
Président de l’Académie luxembourgeoise.

Si les grands bos savaint causèr

I les grand bos savint causèr,
An z’ i vinrout rin qu’ pou apinre
Co ’n sacante côeps tous leûs grands s’crèts,
Des s’crèts qu’an sait’... sês les compinre.
Zoux, qu’ant les pîds pa d’zou la térre
Èt qu’ant l’houpî pa d’lez l’sulo,
Savant qü l’ Cé qui fât l’hivér,
Pou les r’garni, n’arè m’ pus d’mau.

Si les grands bos savint causèr ...

Mâs les grands bos n’ causant qu’asseune
A djèmichant quand l’ vèt chouffèle
Èt leû raconte, croyez-m’, russeune
En fait d’histoires, à la pus belle.

Ces bos, tous ces grands bos, sant toulà d’peûs toudjous,
Ca nôes père les ant veûs avant qü dj’ les voyinches
Èt leûs père à zoux-z’autes y v’naint djè tous les djous
Èt tant d’autes avant zou... bin’ avant qu’i n’ y vninchent.

I gn’è combin d’mille ans qü la terre è trèblè
Pac’ qu’in djou d’dès ses flancs, elle è sètu la vie.
Èt paç’qu’in slo tout nieu, à l’ tchaufant l’ è ganflè,
Voulà l’ dgèrme adormi, tout d’in côep, qui s’ ravit,
Qui s’ ravit èt qui crèche èt couvé les holières.
Èt les tchênes èt les hates y mêlant leûs houpîs
Au moiti des buchnés, des gnét’ èt des foûtchières
Des ranch’ èt des èpines acreumîtes à leûs pîds.
Les vèts, les plôves d’oradge a-n’ èchamplant la s’mèce
Èt d’eune holière à l’aute, tous les bos s’ rasseunant
A houpant les rouchés : c’est l’ miraque qui r’coumèce.
Èt c’est dud’peûs c’ tèps-là qu’ les viès bos s’ russeunant.

Si les grands bos savint causè ...

18