Page 22 - Les paumes su les èteules

L’houmme è fordji du fér èt s’a-n è fât des armes
Èt des hatches èt des cugnes, quand i l’è ieû tordu,
Pou dènâvè les bêtes ou pou bailli l’ alârme.
Èt les bét’ achôrâyes avant trouvè leû mâte
Paç’ qu’i savout mieu qu’zoule coumme la matière est fâte.
Quand, atère les grands âbes, lu slo v’nout raviqui
Les plantes’ èt co les fleûrs, coumme pou les carèssi,
Gn’è qu’ lu qu’è tcheû à g’noux, su lu-méme ruplouyi,
Èt qu’ è dit : «C’est l’ Grand Mâte qui nous l’avoûye aussi.»
Il è r’leuvè les ûyes èt pou mieu voir lu slo,
Il è vlu d’ toutes sès fôerces li échâyi les crâyes.
Èt pou fâre des coûteures toutes vartes èt cadjolâyes,
À côeps d’ hatche èt d’ pioches, il è r’poussi les bos.

Si les grands bos savaint causèr...
Ah, si les bos savint causèr
I nous dèrrint co tout ç’ qü l’houmme
Les i è prins èt frint la soumme
Du ç’ qü pour lu, I n’-n ant wardè.

L’houmme n’è-m’ roubli sès pères qui côepint l’gui du tchéne Ni
l’ermite tout mêr-seûl qui djunout neût èt djou,
Ni les fâyes à langues cottes qui dansaint pa douzènes
Èt les flaûves des autes côeps, i les dèrè toudJous.
Coumme ses pères, pou les bos, i wârde au fond du s’ cœûr
Âque qu’i n’ sait dèfini, tout rapli d’ leûs mystères,
Èt s’i djalôene leûs bôerds du tchèpelles èt d’calvaires,
C’est qu’i r’counut la mai qu’a-n è fât la grandeûr.
I n’è m’ roubli nan pus qü l’bos qui l’è neûrri
Èt tchauffi èt viti èt co fât sa mâjan,
Est co toulà tchèque côep pou l’racude èt l’catchi
Quand’ l’étranger vôerout v’nu forci sa râjan.
Coumme au tèps des bétes fauves, coumme au tèps des Romains,
Les fis r’counuchant co les vouyettes du leûs pères
Et, pou gâgni l’ haut bos, qui sarout mieu les tch’mins
Qü zoux qui les ant cheûs quand an n’ causout m’ du guères. Ca les fis
coumme les pères savant qu’ la térre roudjie
N’achôre mi les braves djens qui n’ v’lant m’ plouyi leu dos...

S’i n’ant-m’ peûr du la môert, in’soufrant-m’ la cordjîe :
La forêt coumme la race atant fâtes du même bos...

Si les grands bos sa vint causè! ...

20