Page 23 - Les paumes su les èteules

Mâs les grands bos n’ causant qu’asseune
Au rez d’ l’ ivér quand l’ vèt chouffèle
Èt si des côeps, leû voix trèbèle,
C’est qu’ à la môert l’hivér russeune.

Les bos qu’ant tant viqui n’ant-m’ dijette d’arminac
Paç’ qu’i sant sûrs, pardié, qu’ si l’hivér c’est le dûye,
La mai qui les è fât rucoummèç’rè l’ miraque
Èt qü l’ sulo d’avri les î r’bârè des fûilles,
Qu’ les gnét’ y r’florirant, qu’ elles rubârant leû miel,
Qu’ les djôenes y r’chouffèl’rant, qu’il y r’fârant leû nid.
Èt qu’ pou l’dgerme qu’est viquant, rin n’est jamais fini
Èt qu’i gn’è m’ in oradje qui n’è m’ su-n arc-en-ciel...
Pardié, tous nos grands bos n’ant d’jette du s’ mette à sougne :
Tchèque saison les î baille mout d’couleûrs èt d’ toilettes
Qu’an dèrout qü l’ Grand Pinte, rin qu’ pou zoux-z’autes apougne
Ses bruches èt ses pinceaux èt fât l’ tou d’ la palette.
Aveu l’ avri tout vart, i s’ lâyant r’mette à nieû,
Èt l’ètè, à côeps d’ bleu, les cadjole co pu fôert.
Avant les neidges d’hivér, paç’qu’il est grandiveû,
El wayien, qu’est si ritche, les arè couvé d’ôers.
Èt la forêt n’ è wârde d’ èt’ jamais dèlônâye
Ca tchèque fûillet qui tôene y ramôene l’harmonie :
D’ l’ houmme, des bétes èt des djôenes, c’est tout au long d’ l’ènnâye
Les pas, les cris, la vie, la plaite ou l’ agonie.
C’est l’afant qu’ y vint cude du muguet à clotchettes
Èt s’a r’vint t’a tchantant flori la Notre-Dame.
C’est les cés qui s’aimant qu’y v’nant l’ dère à catchète
Èt c’est l’houmme qu’è des sougnes qui s’y vint r’fâre in âme...
C’est l’ tchesseû, c’est l’ traqueû èt les tchins qui bowant,
C’est l’ côep d’ fusic qui chlaque, c’est les djôenes dètchèssis,
C’est la béte achorâye qui houle t’ a s’ èqueuiant,
Qui s’caroûye d’dès les fûilles èt vôerout s’rudressi.
Èt peûs, c’est les boquians qu’adeumant à côeps d’hatche
Les grands âbes qui flachant a coichant les fowèles,
C’est les cugnes qui sounnant èt c’est la masse qui fratche,
C’est les rîres èt les flaûves autou des feûs d’ètèles...
Èt c’ n’est qu’à slo boutant qu’ tafât s’tât pou surpinre
Les frujlans des grands âbes fâts d’ espoirs èt d’rugrets...
Mâs zoux s’causant tout bache quand’ is’ dijant leûs s’crêts,
Ces s’crèts qu’an r’sait’,... sês les compinre!

21