Page 32 - Feux-d-holieres

Hassoi bas

P’pa, qu’i-l è dit in côp, èl fis qu’a-n avout s’saû
D’traquèr d’rî les att’ladges, les prés èt les coûteures,
Dju vôrous voir pus lan s’les cayaûx sant si deurs
Ca dj’à hâte du m’ saûvèr èt d’houpèr hôrs du trô.
Touci c’est l’ s’lo qui tane ou c’est la plôve qui fradge,
C’est des mèchans flachies èt an n’sait quoi aû djusse
Ca c’est toudjous r’coumèce, toudjous la mème ouvradge.
Èh bin mi, d’çute vie-là, dj’ n’â bârou m’ ène tarnusse!
Voulez-v’ bin v’târe, mu fis, quu l’pére è rèpandu.
Touci an est co s’mâte èt an vique à sa môde.
An fât s’lit coumme an veut èt quand’ an troûve coummôde
Du s’mette su la culière, pèchône nu s’dit djondu.
An dit vlèti, pardjè, qu’aûte pârt i fât milleûr
Èt qu’an chûe moins aûssi qu’a mèch’nant les denrâyes
Paç’qu’an n’gâgne mi grand tchôse à champlèr sa chueûr
Peûsquu, pou l’pé qu’an médje, an n’è m’du trop d’moulâyes.
La malette pou l’ujine n’pèse mi tant qu’la tcharûe,
An l’sait dud’peûs toudjous mais, ç’qu’an sait bin aûssi,
C’est quu d’fâre les tournàyes, gn a-n è ’ne sacante à tchu,
Pou r’pinre vote place touci, qui r’vinrint bin vlètî.
Des cés-là, dj’seûs bin sûr, s’i gn’avout pont d’tèmoin,
Gn’a-n è taméte qui s’rint méme binâjes aveu moins...
Taméte su bout aux âres du djou
Èt qui trimant à vidreu-côrs
Peûs qui viqu’rant djusqu’à leû môrt
À n’voir qu’les cés qui fant coumme zoux.
Mais note mètièr à nous, à nous les dgens d’la térre
Est-i vormèt si lâd qu’an n’y trouve quu misére?
C’est bin l’preumi mètièr qu’gn’a-n è tant avant nous
Qu’ant v’nu touci pou l’fâre èt tchoisi d’a viqui.
Aveu leûs maigues tropés qu’i traquint pa d’vant zoux,
A cheûjant des tch’mins d’térre djusse à pône afrouyis,
D’oû v’naint-i ces dgens-là? Pou s’dèqueûre dès dandjis?
I nu l’savaint zoux-mémes ou n’s’a souv’naint qu’à pône

32