Page 28 - Feux-d-holieres

L’houmme qui brâyout

Les coûteures du la vie nu sant m’ toudjous aû s’lo,
P’aûx dôrnians d’oradje, les grés s’i fant flachi
Èt quand an n’mèchène pus, faût co bin s’agrîtchi
Pou n’mi, d’tchiquette a miette, s’voir roublî dès s-n aclos.

L’houmme quu dj’â veû l’aûte djou, su s’banc aû ré d’la neût,
M’seunout si dènortè quu dj’ n’â seû passèr oûte.
— S’ v’ez dès sougnes, li â-dj’ dit, dèbout’nez-v’, dju v’ècoûte :
Vous s’rez p’t-ête souladgi, toudjous moins annouyeûx.
— Ô bin, qu’i m’è dit l’houmme, dju n-n arâ m’ pou langtèps :
Dj’â buchi, dj’à gâgni èt taméte côps perdu,
Gn’a-n è qui m’ant âdi, gn’a-n è qui m’ant djondu :
À ç’ t’heûre, dj’seûs maû leûrè èt tout prête à crantèr!
Pou racassi d’ l’aimeûr, dju m’ tins su l’apas d’ l’huche
Mais les cés qui passant nu m’fayant pus d’clignettes
Èt d’auquins qu’ dj’â r’cudu quand’ i-l atint à chuche
Nu m’tap’rint m’ in côp d’ûye quand dj’a-n â l’pus dijette.
Dj’â si pèsant d’la vie qu’ dj’a vôrou voir lu tchu
Èt su l’cadran d’ l’hôrlodge arrâtèr les agûes
Peûs m’lâyi ratortîr bin à pant dès m’linçû :
Ça n’ s’rout qu’in point d’foulè, an n’port’rout m’ in gros duy...
Èt l’houmme brâyout, ça m’fout tant d’maû
Quu dj’ n’arous seû l’lâyi souffri
Èt dj’arous v’lu pou l’rapâri
Trouvèr dès mots qui r’baillant tchaûd.
— I gn è m’ aû mondre Djeu pont d’ban sans quu d’vouloir
Chouflèr lu-méme la lampe tant qu’elle clârtie co ’ne miette.
Hay, allo, dèhotez-v’, s’i gn’a d’meure qu’ène leum’rette,
Baillèz-m’ vote mé, note houmme, dj’a f’rans in ostensoir.
Si l’envie v’ ruprint co d’tapèr la creûx s’la fosse,
Ratèdèz la neûtie, èt dj’seûs sûr qu’avant l’djou
Ène mé qu’ v’ez p’t-ête roublî ruvinrè d’an n’sait d’où
V’caressi la hènette èt vous r’s’rez coumme du noce.

28