Page 24 - Feux-d-holieres

El tèch’rand

Aû fin tchu d’la ruâye, d’la ruâye du tchu bache,
Pa d’dès sa bôgne mâjan èt caûsimèt a s’cret,
Des les djanqués, d’lez la grande dache,
L’tèch’rand viquout... an n’sait coummèt.
Pardjè ç’ n’atout m’ in bablotâ
Ca i n’caûsout m’ co à tourtous.
I n’atout m’ gueûx ni co bribâ,
An n’oyout jamais qu’i s’plédout.

Quand gn’è rin pou les inques
Èt qu’les aûtes ant tafât,
Ç’ n’est m’ toudjous les pus paûves
Qui sant les pus brayâs ...

Pourtant gn’a-n è qu’ant binâji
Èt n’ant m’ mout d’maû, zous, pou viqui.
I n’ant ieû qu’à douvri les uys
Èt s’lâyi tcheûr pa d’dès les pleumes.
Des aûtes, pou pleumes, n’ant ieû qu’des fûilles
Èt pou fachettes, des gadins d’feummes.

In fis d’tèch’rand tcheût dès l’mètî
Èt souvèt s’sôrt est djè crouyi.
Ç’ti-ci n’atout m’ deûs côps malin
I n’è m’ couri bin lan d’la mére :
I broûyout djè ètant gamin
Peûs è apprins l’mètiè du s’pére.

Du ç’tèps-là, dès tous les villadges
An mèch’nout la tchanve èt l’sèran
Pou fâre d’la toile èt co des satches :
Ça fout d’ l’ouvradge pou les tèch’rands.
Plé les aûrmoires des bounnes mâjans,
Gn’avout des piles du draps, d’touyettes,
Des nappes, des tch’mîjes, des blantches bounnettes :
C’est à ça qu’an djudjout les dgens.

24