Page 26 - Feux-d-holieres

Feumâyes

Dj’ n’â m’ co roublî l’gout des feûs d’vatchis du d’dès l’tèps,
Quand l’wayin dèbanout, qu’an pateurout t’ t’avaû.
An traquout sés vèrgougne hâyes, holières èt bochets
Pou trouvèr du môrt-bos, aveu des rûjes du r’naûd.
Quand l’bréjois clârtichout èt qu’les pètans brichint,
An queûjout des pèrnelles, des peummes ou des crambîres;
Mais si l’feû tcharbounnout èt qu’les tuqués chîmint
Des tourbillans d’feumâye nous fint brâre ou tamîr.

An djibôdout vlèti dès l’nuadje bleû-z-èt blanc
A douvrant ses deûx més coumme pou s’y agritchi;
Pou qu’ i s’èpessissiche, an flachout des fradjants
Tout varts, paç’qu’an s’croyout grimanciens tout cratchis.
In côp d’vèt, ène horlâye : v’là note feû ètindu.
Note nuadje rutcheûjout, dju n’atins pus qu’des vatchis
Qui nodint la feumâye. L’ans-dj’mout des côps nodu
A wardant maûgré nous la misse du r’coummèci!

Gn-a-n è-t-i ieù, pardjè, ’ne sacant’ feumâyes après?
Feumâyes des tous les cès, qui lâyint bin dès r’grèts.
Grosses bûles du la tchand’leûr qu’an houpout coumme des gayes
Èt preumières amourettes si tenres quu d’la rouzâye :
Feumâyes !
Feûs d’èspoir du djônesse èt souv’nances du dicâces
Route qu’an croyout florie avant d’a pérde la trâce :
Feumâyes 1
Feûs des bouneûrs proumins su des routes afroûyies
Si sûres qu’an-z-arout cru qu’an t’nout l’Ban Djeu pôs pids :
Feumâyes !
Quand, tout roide, an s’ruleuve pou rwâti pa la crâye
Du grand huche des souv’nances qui d’djou a djou s’ruclôt,
Pa d’dès les dôrnians des ènnâyes cadjolâyes,
An r’davine les lueûrs dès bréjois des aûtes côps.

26