Page 30 - Feux-d-holieres

La vieille

Aveu sa vieille figure èt sa pé ratchitchîe,
Szs quèques toquâyes du poils tout-aûtou du matan,
An la voyout souvèt bachîe, acouvissîe
Dès les âries du s’méche qu’elle chèrbout bin à pant.

An la dijout bigote èt pardjè ç’atout vrâ
Qu’elle pôtèrnout souvèt èt fout des tâs d’neuvênes
Pou qu’i pluviche à tèps (mais mi les djous d’buâye!)
Èt qu’les pouillettes pouninche pa d’vè la Sinte-Hèlêne.

Ô, ç’atout ’ne mout bounne dgens, toudjous brâve èt hounnéte,
Qui n’dormout m’ la neûtîe quand’ elle avout maû fât.
Lîe, qui n’arout m’bribè méme ène téte du nounette,
N’baillout m’ pourtant vlètî èt n’aimout m’ les preûnâs.

Elle nu s’avout m’ mariè, put-ête faûte d’occâsian,
An n’sait d’abôrd nan pus ç’qu’elle arout fât d’in houmme,
S’elle arout seû l’wardèr méme à la canditian
Qu’i n’ s’rout qu’in pounî d’pus ou in dâbô tout coumme.

Si des maû aboûtchis, a s’moquant, lî lancint
Des chornettes à deûx sès a caûsant dès «linières»,
Ou bin, elle fout méssian qu’elle nu campèrnout rin,
Ou bin, elle su cour’çout èt elle rotchout dès pierres.

Èt bin sûr, ç’atout lîe qui, traquâye paû rumôrd,
S’a-n allout, t’a priant, s’acûsèr des deûx faûtes :
D’avoir oyu ’ne dijâye malhounnéte et, à tôrt,
D’avoir sandgi à maû a s’cour’çant su les aûtes...

Quand’ elle avout quèques sous, elle nu les galvaûdout m’ :
Elle nu s’arout m’ seûl’met päyi l’satchèt d’roudje sucs
Pou sa rheume à l’hivér. Elle wâtout d’fâre ène soumme
Èt pou l’arandi d’pus, elle avout tous les trucs.

30