Page 33 - Feux-d-holieres

I n’su souv’naint quu d’mâtes qui n’faint quu d’les fradgi
À côps d’sougnes, d’caruâyes èt co d’guèrres pou les djônes.
Ç’qu’i tchèrchaint, c’est d’ête libes su ’ne térre qui les neûrit
Avoir du bin aû s’lo, ête sûr qu’i mèchèn’rant,
Libes d’y fâre ène mâjan, d’y viqui èt d’mouri
Èt d’savoir qu’après zoux, leûs afants rahèn’rant.
Les fis après les péres, tout tchèquin anouvrè,
Pou fàre la paût pus belle ant bayi leû chueûr.
La mâjan è crèchi, elle è méme èsseumè
Ca les djônes djusqu’à ç’ t’heûre y ant trouvè l’bounheûr.
Çu n’è m’ ètu sés maû, mais pèchône nu crantout
Èt pèchône nu trouvout qu’la térre atout trop bache.
Quand i gn’avout d’ l’ouvradge, gn’a-n avout pou tourtous
Quand an veut bin s’atède, çu n’est m’ toudjous l’méme qui coiche.
À la grande taûle gn’avout d’la place
Mais çu n’atout m’ toudjous dicâce :
Follout buchi tout l’long d’ l’ènnâye
Pa tous les tèps èt hây-da-day!
S’les térres sant bounnes aneû, ç’ n’atout qu’dès trûches, pardjè.
I-l è follu sôrtèr, dènvèr les èpines,
Rasseunèr les bouquets, môrlèr les pus seurets
Peû.s saûclèr les tchardrans èt mâtrir les pavines.
Èt tout ça à la mé. Aneû gn’è des endgins
Èt des utils du djâbe qui fant l’pus gros d’ l’ouvradje;
Èt quand l’sulo s’a mèle d’avri djusqu’à wayin,
Les coûteures florichant èt c’est ça qu’acouradge.

P’pa, qu’è dit l’fis, pourtant an n’vique pus coumme dès l’tèps;
Quand sa djournâye rst fâte, l’ouvrî, lu, fât ç’qu’i veut.

C’est ainla, qu’è dit l’pére? Dju n’ viqu’râ pus langtèps :
Gn’è pus qu’à mette hassoi bas quand l’fis est dèserteû.

33